ادم زويتينة و المعروف فالساحة الفنية باسم Skizo Beats، تزاد فمدينة الدار البيضاء بضبط فعين السبع سنة 1995.
عكس العديد من الفنانين المغاربة ادم ماكانش عندوا اهتمام بالموسيقى و اكتشف عالم الموسيقى بصدفة عن طريق صديق ديال الطفولة ولي غادي يمشي معاه لأول مرة للستوديو التسجيل و فيه غادي يكتشف ادم كواليس تسجيل الاغاني.
تحدي ديال ادم غادي يبدا فاللحظة لي دخل فيها للستوديو التسجيل بحيث صاحب الاستوديو غادي يطردو، هادشي لي ماغاديش يتقبلو ادم و غادي يقرر انه يدخل لهاد المجال و يبدع فيه.
ادم غادي تبدل المسيرة ديالو منين غادي يخدم لاول مرة مع الرابور المغربي زكرياء بركان المعروف باسم Moro، هاد الاخير لي غادي يعطي الثقة ديالو كامل لادم و غادي يكلفو بتسجيل و ميكساج البوم Kalimoro و من هنا غادي تبدا رحلة ادم فعالم الموسيقى و الراب المغربي.
ادم غادي يشارك و يكون واحد من المؤسسين ديال اكبر مجموعة راب مغربي واي غادي تعرف باسم CB4 GANG، ولي غادي يكون الهدف ديالو انهم يعاونوا الشباب المغربي و يأطروه موسيقيا باش يلقى راسو.
من بعد مدة ادم و لي معروف فنيا باسم Skizo Beats غادي يولي واحد من Hit makers ديال الساحة الفنية و غادي يتعامل مع بزاف ديال الفنانين المغاربة من مختلف الانواع الموسيقية بحال Mocci، Lferda، ILY.. و العديد.
ادم غادي يطلق اول البوم فالمسيرة الفنية ديالو و لي غادي يجمع فيه نجوم الساحة الفنية الموسيقية في المغرب ولي استغرق مدة الانتاج ديالو اكثر من سنتين.
