كيواصل الرابور المغربي ديزي دروس توسيع حدود الراب المغربي من خلال المشروع الجديد ديالو “أفلام”، اللي اختار يقدمو بطريقة مختلفة كتمزج بين الموسيقى، الصورة، والسينما، فواحد من أكثر المشاريع المنتظرة فالساحة الموسيقية المغربية هاد السنة.
هاد المشروع الجديد ماوقفش غير عند إصدار ألبوم غنائي، باش يقرب الجمهور من كواليس صناعة الألبوم الجديد ديال Dizzy DROS، بداية من جلسات الكتابة والتسجيل، وصولًا للإنتاج الموسيقي، التصورات البصرية، وبناء الهوية الفنية الخاصة بالمشروع.
ألبوم “أفلام”.. 21 تراك مستوحى من عالم السينما
وبالتزامن مع الإعلان على الوثائقي، طرح ديزي دروس جميع أغاني ألبوم “أفلام” عبر قناته الرسمية، وهو المشروع اللي كان منتظر بقوة من طرف جمهور الراب المغربي، خاصة بعد النجاح الكبير اللي حققو فالأعمال السابقة ديالو وعلى رأسها ألبوم “عزي عندو ستيلو”.
الألبوم الجديد كيتضمن 21 أغنية، وكل تراك فيهم متصمم كأنه مشهد سينمائي مستقل، عندو الإحساس والقصة والهوية البصرية الخاصة بيه. واعتمد Dizzy DROS فهاد المشروع على أسلوب سردي كيمزج بين التجارب الشخصية والخيال الفني، باش يخلق تجربة سمعية وبصرية مختلفة على المعتاد فالساحة الحضرية المغربية.
مواضيع متنوعة وإنتاج موسيقي ضخم
ألبوم “أفلام” كيعالج مجموعة من المواضيع اللي قريبة من حياة الجمهور، من بينها الطموح، الشهرة، الحب، الغضب، الذكريات والصراعات الشخصية، مع الحفاظ على الأسلوب الكتابي الحاد والصريح اللي معروف بيه ديزي دروس.
كما راهن الفنان المغربي على Production موسيقية ضخمة ومتنوعة التأثيرات، فمحاولة لرفع المستوى التقني والفني ديال المشروع، وتقديم عمل قادر ينافس على المستوى العربي والدولي.
Featurings قوية تجمع أسماء بارزة
الألبوم الجديد ديال Dizzy DROS عرف مشاركة مجموعة من الأسماء المعروفة داخل الساحة الفنية، من بينهم ElGrandeToto وSofiane Pamart وInkonnu وMoro، إضافة إلى Nada وMehdi K-Libre، وهي collaborations اللي عطات للمشروع تنوع موسيقي كبير وجمعت بين مدارس مختلفة داخل الراب المغربي والموسيقى الحضرية.
Warner Music Group تدخل على الخط
ومن أبرز النقاط اللي زادت تعطي وزن كبير لمشروع “أفلام”، كاين التوزيع العالمي ديالو عبر Warner Music Group، فخطوة اعتابرها متابعون مؤشر جديد على دخول الراب المغربي لمرحلة أكثر احترافية وانفتاحًا على السوق الموسيقية العالمية.
وبهاذ المشروع، كيبين ديزي دروس مرة أخرى علاش كيعتبره بزاف من المتابعين واحد من أكثر الفنانين تأثيرًا فتطور الراب المغربي خلال السنوات الأخيرة.
