منال بنشليخة فنانة وكاتبة كلمات مغربية تزادت سنة 1993 بمدينة الدار البيضاء و انتقلت لمدينة مراكش و معروفة فالساحة الفنية باسم Manal. فالوقت لي كانت كاتوجد الماجيستر في الإدارة و التمويل بدات كاتلوح فيديوات فاليوتوب و عن طريق هاد الفديوات تم اكتشاف الموهبة ديالها المنتج و الديجي المغربي DJ Van.
من بعدما وقعات عقد مع شركة الإنتاج Magic Castle المملوكة ل DJ Van، و اصدار اول اغنية لها بعنوان “Denia” ولي ربحات بها العديد من الجوائز كأفضل فنانة فشمال افريقيا سنة 2015.
من بعد غادي توقع عقد مع مدير اعمال جديد ولي كان هو طارق أزوغاره المعروف عالميا و الساحة الفنية باسم Cilvaringz ولي كان عضو فمجموع Wu-Tang Clan العالمية.
طلقات منال فيديو كليب اغنية جديدة جمعاتها ب DJ Van بعنوان “كلشي بان” ولي عجبات شركة الانتاج العالمية Sony Music و اصبحت منال اول فنانة مغربية لي عندهم عقد مع الشركة العالمية.
منال غادي ترجع للساحة الفنية فسنة 2018 بفيديو كليب اغنية جديدة بعنوان “Taj” لي عرف مشاركة الرابور Madd و حقق نسبة نجاح كبيرة فالمغرب و خارج المغرب خصوصا انه كان بستيل الراب لي الجمهور مامولفش منال بيه.
من بعد شهريين نفس السنة منال طلقات فيديو كليب جمعها بمجموعة الراب الشهيرة Shayfeen بعنوان “Nah” ولي حقق نسبة نجاح و مشهدات عالية بأكثر من 18 مليون مشاهدة.
منال غادي تأكد النجاح ديالها بفيديو كليب “SLAY” لي جمعها بالرابور المغربي طه الفحصي المعروف باسم ElGrandeToto ولي قدر يوصل للعالمية و حقق نسبة مشاهدة عالية بأكثر من 54 مليون مشاهدة على اليوتوب.
في نوفمبر 2019 ، وقعت منال عقد توزيع مع RCA Records ، ولي هي شركة تابعة Sony Music Entertainment France و فسنة 2020 علنات الفنانة على اصدار اول البوم فالمسيرة الفنية ديالها بعنوان “360” ولي تم الاصدار ديالو فسنة 2021 ولي لقا نجاح كبير فضرف قليل حقق اكثر من 64 مليون استماع فجميع المنصات الموسيقية و كايتعتابر من اهم الالبومات لسنة 2021.
