خديجة أو Katy M (كاتي ام) كاتعتابر أول DJ امرأة في المغرب من مواليد 1980، من بعدما اكتشفت الشغف ديالها للموسيقى الإلكترونية قررات باش تبدا تعلم mixage بمدينة الرباط.
2009 اختارت Katy M أنها تستقر فمدينة مراكش، و هنا فين غادي تجيها الفرصة باش تتلاقى ب Luca Anselme ولي هومسؤول فإذاعة Hit Radio.
2010 غادي تتعاقد معاهم باش تولي DJ عندهم، وبداو الأبواب كايتحلوا فالوجه ديال كاتي ام وغادي يبداو يجيوها الفرص باش تخدم فبزاف ديال النوادي الليلية و المهرجانات من طنجة للداخلة، و اصبحت واحدة من أهم الأشخاص فساحة الموسيقى الإلكترونية المغربية.
شاركت Katy M فبزاف ديال المهرجانات من أهمها (Maroc Hit Parade، Sun Festival, Saidia Med Festival…)، هاد المهرجانات لي حضروا لهم ملايين الأشخاص هادشي لي غادي يخليها تربح الثقة ديال بزاف المدارس المغربية العليا و يطلبوها باش تبقا تحضر للحفلات ديالهما.
فسنة 2011 كاتي ام غادي تخلق واحد المفهوم جديد بإسم “Ladies Touch”، شاركوا معاها بزاف ديال الفنانين مغاربة فيه.
2012 كانت كاتي ام هي المغربية الوحيدة لي شاركات فمهرجان (French Connexion Music)، ولي كانوا مشاركين فيه بزاف ديال DJs المعروفين في الساحة الفنية الفرنسية بحال Benedetto&Farina.
المعهد الفرنسي بمراكش نضم مشروع بعنوان “Je me souviens” فسنة 2013 بمشاركة 11 الفنان مغربي و فرنسي و كانت كاتي ام من بين الفنانين الحاضرين فهاد المشروع. نفس العام صنفات المجلة الدولية Afrique Asie الفنانة المغربية كاتي ام على أنها ملكة البلاتين (Reine des platines).
2014 أكدت Katy M على الموهبة ديالها و كانت عضوة لجنة تحكيم ديال بزاف المسباقات بما فيهم (Celebrity Tour) ولي كانت كاتنظمها مجلة Celebrity Magazine، و شاركات ف Sun Festival.
من بعد الخبرة لي جمعاتها قررات خديجة أو Katy M باش تبدا تشارك الخبرة ديالها مع الشباب لي باغيين يبداو فالموسيقى الإلكترونية، وبدات كاتعطي دوروس بشراكة مع جمعيات من أهمهم (جمعية شباب المغرب و جمعية الصويرة موگادور).
الفنانة كاتي ام ماشي غير DJ حيت من غير الموسيقة الإلكترونية فهي استاذة في الموسيقى و كاتقري Solfège و البيانو.
المغرب و الساحة الفنية الإلكترونية كايفتاخروا بتواجد كاتي ام فيه بحيث كاتعتابر هي أول Dj امرأة فالمغرب و العالم العربي.
