طلق الرابور المغربي ستورمي الألبوم الجديد “DESPERADO” ديالو نهار الجمعة 22 ماي، من بعد حملة ترويجية ضخمة وقدّات نقاش كبير فالساحة الموسيقية المغربية خلال الأسابيع الأخيرة.
ستورمي وفريقو اختارو يديرو Roll-Out بطريقة مختلفة وبمستوى عالمي، جامع بين الإبداع البصري والتفاعل مع الجمهور. وفخطوة جريئة، رفض الفنان يعتمد على الذكاء الاصطناعي فتصوير الـ Cover الرسمية ديال الألبوم، وفضّل يصورها مع “بانتيرا كحلة” حقيقية، باش يوصل إحساس خام وواقعي كيعكس الهوية الفنية ديال المشروع بلا تصنع.
الأجواء ديال الألبوم بدات كتبان من خلال جوج كليبات سينمائيين شدّو انتباه الجمهور بجودة الصورة والإخراج. أول كليب تصوّر ففرنسا، بينما الكليب الثاني خدا الفانز لليابان وسط أجواء بصرية مستقبلية كتأكد الطابع العالمي ديال المشروع. وزاد ستورمي رفع الحماس من خلال Featurings مع أسماء معروفة بحال M Huncho وManal وTIF وJRK 19 وMC PH.
ومنذ 2 أبريل، وشاحنة عملاقة لابسة ألوان وهوية الألبوم وهي كتدور مختلف مدن المملكة، فواحدة من أكبر الحملات الترويجية اللي تشافت فالمغرب، واللي خلات الجمهور يعيش أجواء الألبوم قبل حتى ما يخرج رسميًا.
أما الحدث الأكبر، غادي يكون نهار الخميس 21 ماي، فين غادي يجمع ستورمي الفانز ديالو فـ Release Party ضخمة فـ Secret Location غيبقى البلاصة ديالها سرية حتى للحظة الأخيرة. أكثر من 1500 من الـ Top Auditeurs ديالو غادي يكونو حاضرين فهاد الليلة الخاصة.
ولتنظيم هاد الحدث، توفرو 30 كار بشكل مجاني باش ينقلو الجمهور للمكان ديال الحفل، فواحد التنظيم اللي نادر يتشاف فالساحة الموسيقية المغربية. وحتى الناس اللي ماقدروش يحضرو، غادي يكون الـ Live مباشر على الصفحات الرسمية ديال ستورمي ابتداءً من التاسعة ديال الليل.
بهذا المشروع الجديد، كيبين ستورمي مرة أخرى باللي ماشي غير رابور، ولكن فنان عندو رؤية كبيرة وطموح باش يوصل بالموسيقى المغربية لمستوى عالمي.
