عصام حريص المعروف فالساحة الفنية ب Issam تزاد فمدينة الدار البيضاء سنة 1993, هو رابور و كاتب كلمات، بدا الراب ف 2017 وطلق أول طراك ديالو بعنوان “حسني”.
عصام تشهر بمزج ديالو لأغاني الراي بموسيقى الراب و هادشي لي خلاه يكون عند موسيقتو طابع خاص.
الجمهور غادي يكتشف Issam أول مرة ف featuring لي جمعو بالرابور Elgrande Toto بعنوان “Bavra”.
ولكن البداية الاصلية ديال عصام كانت ف 2018 بعد ماطلق طراك بعنوان “Trap Beldi” لي لقا اعجاب كبير من عند الجمهور و قدر يفوت +15 مليون مشاهدة على يوتوب.
2019 غادي يوقع عقد مع وحدة من أكبر شركات الانتاج فالعالم Universal Music France، كان فداك الوقت هو أكبر عقد فراب المغربي من ناحية القيمة المالية.
عصام طلق اول البوم فالمسيرة الفنية ديالو فسنة 2021 بعنوان “كريستال” ولي حقق نسبة استماع عالية على المنصات الموسيقية.
