الموسيقى كانت دائما موضوع نقاش و عدم اتفاق بين علماء الدين و من بين المواضع لي اختلفوا فيها و خصوصا كايكثروا التساؤلات على الموسيقى في رمضان.
البعض من فقهاء الدين كايقولوا حرام و البعض كايقولوا حلال و كايعطيو أدلة كثيرة على ان الموسيقى ماشي حرام فالإسلام.
هادشي لي كايخلق جدل كل عام بين الناس و كايخلي بزاف ديال التساؤلات لي كاتطرح بين الناس و المسلمين بشكل خاص.
على سبيل المثال : واش الموسيقى حلال ولا حرام ؟ واش الموسيقى كاتفطر فرمضان ؟
هادشي لي كايخلي معظم الفنانين المغاربة انهم يحبسوا الانتاجات الموسيقية خلال هاد الشهر الفضيل.
و باش نجاوبوا على التسؤلات ديالكم، قام فريق عمل سمفونيات البوابة الأولى للموسيقى المغربية ببحث كبير فالموضوع باش يجاوب على بعض التسؤلات.
1- القرآن الكريم
الله سبحانه و تعالى ما ذكرش الموسيقى في كتابه الكريم، و ماكاينش شي آية قرآنية لي كاتحرم الموسيقى او كاتنهي على السماع لها.
2- السنة النبوية الشريفة
نفس الشيء بالنسبة للأحاديث النبوية الشريفة، ماكاينش شي حديث نبوي صحيح لي كايحرم الموسيقى.
3- الصحابة رضي الله عنهم
الصحابة رضي الله عنهم اختلفوا فالعديد من المواضيع لي من بينهم الموسيقى، ولكنهم ماشي مشرعيين.
صالح المغامسي
ولي هو امام و خطيب في مسجد قباء لي هو اول مسجد فالاسلام، جاوب فواحد من اللقاءات على سؤال واش الموسيقى في رمضان حلال او حرام وقال ان الموسيقى حلال و ماكاتفطرش فرمضان و ان الله سبحانه و تعالى لو كان بغا يحرم الموسيقى كون نزلات آية قرآنية كيفما نزلات على الخمر و الميسر…
الموسيقى في رمضان
الموسيقى فرمضان ماكاتفطرش الى اذا كانت كاتدعي الى معصية الله و ما حرم الله اما غير ذلك فهي ماكاتفطرش.
