مهدي رباطي المعروف فنية ب Madd تزاد فمدينة الدار البيضاء سنة 1995، بدات الموهبة ديالو فالموسيقى كاتبان فسن صغير، خصوصا انه من عائلة موسيقية و الأخ الكبير ديالو هو Shobee من مجموعة Shayfeen.
2009 بدا Madd كايسجل أول طراكات ديالو ولي ماشركهمش مع الجمهور، وكان كايسمعهم غير هو و الناس لي قراب ليه.
أسس ماد مجموعة هو Tagne لي كان الإسم ديالها Xacto وطلقو أول فيديو كليب ديالهم سنة 2016 بعنوان “غانديرها” ولي كان اول طراك من Ep جديدة بعنوان “EXTASE”.
من بعد عام Xacto قرروا ان كل واحد يكمل بوحدو و المجموعة تفارق.
2017 ماد غادي يطلق أول فيديو كليب ديالو بوحدو بعنوان “3310” ولي لقا نجاح كبير و الفيديو كليب عرف كثر من +7 مليون مشاهدة فيوتوب.
ماد غادي يدير collaboration مع بزاف فنانين بحال Elgrande Toto، West، حليوة… ولي كلهم لقاو نجاحات كبيرة و اعجاب كبير من عند الجمهور.
2019 شارك Madd فالألبوم لي نتجاتو Naar ولي شاركوا فيه فنانين مغاربة بحال شايفين، عصام… وفنانين أوروبيين بحال Laylow, Dosseh.
2020 طلق ماد أول البوم ديالو بعنوان “Black Rose” ولي فأقل من أسبوع قدر يفوت أكثر من 3 مليون استماع على المنصات الموسيقية.
ماد كايتعتابر رمز من رموز الجيل الجديد ديال الراب مغربي ولي قدر يدير بلاصتو ويطبع الاسم ديالو فتاريخ الراب مغربي.
