فريد غنام تزاد في اكادير و كبر في عائلة موسيقية من أم عازفة البيانو و اب accordéoniste و الخال ديالو كان عازف على الباتري.
في فترة المراهقة ديالو تعرف على موسيقى الكناوة و شعر انه قريب من الكامبري (آلة موسيقية كناوية تقليدية) و خصصها كآلة موسيقية المفظلة و كان من بين الأوائل لي عزفو على آلة الكامبري الكهربائي.
في سن 18 العام وصل للدارالبيضاء كموسيقي للكناوة و كان في اقل من عام في مجموعتين •Gnawa click• لي كان فيها كموسيقي الباس و المجموعة الثانية •Gnawa fusion• في 2005.
بين 2006 و 2012 فريد غنام كان معروف بإسم Farid Mayara و ربح مع المجموعة ديالو •Mayara Band• كأحسن مجموعة fusion في مسابقة الأجيال موازين في 2007 و كأحسن مجموعة fusion في مسابقة الشباب الموسيقيين •L’boulvard• في 2008 و في نفس العام خرج اول سينغل مع الكروب ديالو “Haly Gnaoui“ لي لقا نجاح كبير بزاف.
من بعد نجاح الأغنية، الشركة الوطنية للاذاعة و التلفزة SNRT غادي تتكلف بانتاج فيديو كليب للأغنية سنة 2009 تحت اشراف ملكي، بحيت ان المجموعة استفدت من هبة ملكية من صاحب الجلالة الملك محمد السادس.
في 2011 المجموعة ديال فريد غنام غادي تخرج اول ألبوم ديالها بعنوان “Derbala”.
في 2012 الفنان فريد غنام نجح في الكاستينغ ديال الموسم الاول ديال The Voice في العالم العربي هاد المشاركة كشفات على الابداع ديالو ولي وصل للنهائيات لي كان 100٪ مغربي، فريد غنام ماربحش The Voice ولكن ربح حب الجمهور المغربي و العربي و الفيديوات ديالو حققوا نسب مشاهدة عالية كثر من 80 مليون مشاهدة على اليوتوب.
في عام 2015 شارك فريد في مهرجان موازين في الرباط و كان ضيف برنامج رشيد شو، في نفس العام خرج كليب اغنية بعنوان “Dima Hamdoulilah” بالستيل الخاص ديالو لي بيه ولا محبوب عند الجمهور العربي و المغربي خاصة.
في 2016 خرج فيديو كليب بعنوان “Inti Diali” لي كانت هدية للزوجة ديالو.
في عام 2019 فريد غنام خرج فيديو كليب “Belgana” لي حقق نجاح كبير بزاف و وصل عدد مشاهدات الكليب لأكثر من 22 مليون مشاهدة في اليوتيوب و أخر اعمالو فيديو كليب “Barda” لي في 4 اشهر حقق اكثر من 4 مليون مشاهدة.
