حمزة مستعد أو Fat Mizzo تزاد فمدينة الرباط سنة 1991، بدا الاهتمام ديالو بالموسيقى و هو فسن صغير، ولي كانت حاجة طبيعية بحيث كبر فوسط عائلي موسيقي و الأب ديالو كان كايعزف على آلة العود.
فسن 13 السنة حمزة بدا كايتعرف على راب و على ثقافة الهيب هوب، وهادشي راجع للأخ ديالو لي كان عاندو مجموعة ديال الراب، و غادي يبدا يكتاشف حمزة نوع جديد ديال الموسيقى و ايبدا يسمع للفنانين من أمريكا بحال Mobb Deep, Big Pun…
من بعد عام حمزة غادي يجرب باش يكتب أول طراك ديالو ولي غادي يزيد يعاونوا فالكتابة هو أنه كان كايسمع لبعض المجموعات المغربية بحال Mafia C و Maroc Connection…
فهاد الوقت حمزة غادي يدخل للمعهد الموسيقى و غادي يبدا يتعلم العزف على البيانو، ولكن ماغاديش يدوز بزاف حيت ماشي داكشي لي كان باغي، و كان باغي شي حاجة لي مافيهاش قوانين و يحس براسو حر فيها و يلقى راحة ديالو فيها.
واخا التجريبة فمعهد الموسيقى كانت صغير، حمزة غادي يدير استوديو موسيقي في گراج ديال الدارهم و غادي يولي منتج و Beatmaker و يسجل أول طراكات ديالو، لي بدات كاتبان فيهم البدايات و المستقبل ديال Fat Mizzo.
من بعد Fat Mizzo غادي يبدا يقلب على فنانين الراب باش يشارك معاهم الموهبة ديالو، وغادي يتلاقى ب Fayer من بعد ماخدا الباك و يمشي يكمل قرايتوا فمدينة الدار البيضاء.
غادي يطلق Fat Mizzo أول طراك ديالو بعنوان “Drunk”، هاد الطراك لي لقا واحد النجاح كبير و خلى بزاف فنانين الراب يعتارفوا بالموهبة ديال حمزة و القدرات ديالو، هادشي لي غادي يخلي Don Bigg يختارو باش يكون جزء من mixtape ديالو “Byad W K7al”.
المعروف على Fat أنه كايتعطل باش يطلق شي طراك و كايبقى المدة عاميين ولا 3 سنين باش يطلق طراك واحد، واخا هادشي قدر أنه يصنع اسم ديالو وسط بزاف الروابا و يخلي البصمة ديالو فالراب المغربي
