من بعد الهجوم الكبير لي تعرض ليه الرابور المغربي ايهاب اقبال المعروف باسم “حليوة”، خرج الرابور المغربي عبد العالي القادري المعروف فالساحة الفنية باسم علي صامد “Ali Ssamid” فمباشر على موقع التواصل الإجتماعي Instagram و دافع على حليوة رغم الخلافات لي كانت بيناتهم من قبل.
و خلال المباشر علن الرابور المغربي علي صامد على انه غادي يوقف فالصف ديال المواطن ديالو و غادي يدافع عليه بحيث ان الكلاش بين الرابور حليوة و الرابور الحزائري ديدين كانون خدا طريق اخرى و تدخلوا فيه فنانين جزائيرين ماعندهمش علاقة بالموضوع من بينهم الرابور الجزائري Trap King لي هدد حليوة، شيء لي استفز الرابور المغربي Ali Ssamid و قام بنفس الشيء للرابور الجزائري.
و في اقل من 24 ساعة طلق الرابور المغربي عبد العالي القادري فيديو كلاش على موقع اليوتوب بعنوان “Trap Fake” ولي كان موجه للرابور الجزائري، هاد طراك لي دخل فأقل من 12 الساعة للطوندونوس المغربي و الإسباني و حقق اكثر من 300 ألف مشاهدة.
من بعد الرابور الجزائري غادي يطلق فيديو كليب، هادشي غادي يخلي علي صامد يرجع بكلاش جديد بعنوان “الجنرال الحاكم” و لي كان قوي من ناحية الكلمات و لي دخل بيه للطوندونس.
